Agaasimaha Maamulka iyo Maaliyada wasaaradda caafimaadka Puntland Mohamed Xuseen iyo madaxa qaybta caafimaadka ayaa hooyada iyo dhallaanka Sucdi Xamid Ciise ayaa maanta kormeer shaqo ku tagay cisbitaalka garowe qaybta loo diyaariyay inay ku dhasho hooyada qabta Covid19.
Agaasimaha oo ay wehelisay madaxa hay’adda UNFPA Puntland Baxsan Siciid ayaa kormeeray qaybta gaar ah ee loo diyaariyay inay lagu eego xaaladeeda caafimaad ayna ku dhasho hooyada uurka leh ee qabta xanuunka Covid19.
Masuuliyiinta ayaa marka ay qol qol ugaleen qaybaha uu ka koobanyahay iyo sida loo diyaariyay waxay warbixin ka dhagaysteen dhakhtarka xarunta joogay, waxaana dhakhtaradu usheegtay in xaruntaan loogu talagalay in lagula tacaalo hooyada uurka leh ee qabta xanuunka Covid19 adeega la siinayaana uu yahay lacag la’aan, sababta qaybtaan loo sameeyayna ay tahay si dadka kale looga badbaadiyo xanuunka, xananayn gaar ahna uhesho hooyada xanuunka qabta.
Baxsan Siciid Madaxa UNFPA Puntland ayaa bogaadisay shaqada wasaaraddu qabatay iyo sida loo ilaaliyay in hooyada uurka leh ee xanuunka qabta ay uhesho adeega ay ubaahnayd.
Agaasimaha Cisbitaalka Garowe Hodan Ali Shire oo masuuliyiinta ku soo dhawaysay ayaa dhankeeda shaqada ay wasaaraddu qabatay ku amaantay waxayna xustay in ka cisbitaal ahaan ay ufudedayn doonaan helitaanka adeegooda hooyada uurka leh ee xanuunka qabta ama iskaga shakida ee aan la baarin.
Agaasimaha Maamulka iyo Maaliyada Mohamed Xuseen waxa uu ku amaanay maamulka cisbitaalka dhakhaatiirta iyo hay’adda UNFPA qaybtaan cusub ee lagu so daray cisbitaalka, waxaana uu hooyooyinka uurka leh ee xanuunka qaba uu kula taliyay inay halkaan yimaadaan ayna ka heli doonaan adeega ay ubaahanyihiin waliba isaga oo lacag la’aan ah.
Agaasimaha ayaa ugu danbeyn xusay in ka wasaaradda caafimaad ahaan ay muhiimada koowaad utahay in bulshada nooc kasta oo ay tahay gaarsiiyaan adeega ay ubaahanyihiin, ayna ka baajinayn xanuunka Covid19.
Xaruntaan ayaa noqonaysa qaybtii ugu horaysay ee laga hirgaliyo Puntland waxaana taasi ay qayb ka tahay dadaalada wasaaraddu ugu jirto wacyigalinta iyo yaraynta fiditaanka xanuunka Covid19.
